القائمة الرئيسية

الصفحات

اخر الاخبار [LastPost]

نصائح مهمة جدا قبل التحديث ل ios 15 رسمي

 قبل مايخرج 15 ios ..

هذي بعض النصائح الذهبية كيفاش تعامل مع ميزاجورات ديال آبل مستقبلاً..


المستخدم الذكي ملي كيخرج شي إصدار كبير فحال 13 أو 14 أو 15 ماكيديرش التحديثات الأولى..


لأنه في بداية كل إصدار الأيفون غالباً كيكون غير مستقر وكيبانو فيه بعض المشاكل ..

و آبل كتبدا تصلح دوك المشاكل بالتدريج في الإصدارات الفرعية الأولى..


هاذ المشاكل بعض المرات كيكونو على شكل أخطاء و تشنجات بسيطة في النظام..وبعض المرات كيكونو أخطاء مؤثرة..


بعض المرات آبل كتصلح شي مشكل و كيبان مشكل آخر في الهاتف..


تالا كان الإصدار 15 مستقر من البداية وخدام مزيان، فراه أغلب التطبيقات لي كتخدم بهم عيكونو غير متوافقين مع الإصدار الجديد و كيكونو باقي ماداروش ليهم ميزاجور..

وبالتالي عتعيش واحد الفوضى ديال المشاكل في بداية الإصدار 15 أنت في غنى عنها..


لهذا من الأحسن صبر وخليه تايستقر مزيان وديرو ..


هاذ الإستقرار غالباً كيكون في 15.3..


يعني المستخدم الذكي ملي كيدير هاذ التحديث وكيشوف النظام خدا الإستقرار والثبات الكافي كيحبس الميزاجورات وماكيبقاش يدير تا شي تحديث..


علاش..لأن التحديثات لي ماجين غالباً ماكيكون فيهم والو..

من غير إذا زادو لك بعض الإيموجي في كيبورد 😂.


يعني ماكيبقاش كل مرة يحمق راسو مع هاذ التحديثات الصغيرة لي ربما يقدرو يثقلو ليه تيليفون و يطيحو ليه ليطا ديال الباتري لي تقدر تنفعو إذا بغا يبيع الأيفون، ويبقى ديما مشطون مع هاذ الميزاجورات بلا فائدة..


التحديث الثاني فوقاش كيديرو ؟


ماكيديرو تاكتقرب آبل تحبس التحديثات وتمشي لإصدار كبير جديد..

يعني تال 15.7 مثلاً..


وبالتالي كيربح آيفون شابع استقرار وتصلحو فيه جميع الأخطاء وتسدو فيه جميع الثغرات..


وإذا كان هاذ الشخص أكثر ذكاء يقدر كاع مايديرش هاذ الميزاجور..

علاش ؟..باش مايعطيش الفرصة لآبل تلاعب بأداء الجهاز وصحة البطارية في التحديثات المقبلة كيما رجعنا كنشوفو في السنوات الأخيرة..

لأنها في الأول كتكون مشغولة مع أخطاء ومشاكل استقرار النظام..

..


دابا سالينا من الناس ديال الميزاجورات..


أراك دابا للناس لي مهتمة بالجيلبريك كيفاش يتعاملو مع ميزاجورات ديال آبل..😎


هما أصلاً كاعما كتهمهم دوك الثغرات الأمنية لي آبل كل مرة كتخوف بها الناس باش يديرو ميزاجور دغيا…


لأن الخطورة ديال هاذ الثغرات هي فالأصل غير موجهة ليك أنت كشخص بسيط..وإنما هي موجهة للمنظمات والحكومات والشخصيات المعروفة والمؤثرة..

يعني هاذو هما لي خصهم يخافو من هاذ الثغرات إذا استغلوها الهاكرز الدوليين ضدهم..


و ثاني حاجة لأن أصلاً هاذ الثغرات هما لي كيقلبو عليهم الهاكرز ديال الجيلبريك باش يخرجوه ليك ..

كيفاش بغيتي يخرجولك جيلبريك في شي إصدار مافيه تا ثغرة في النظام..؟ 😂


لي مهتم بالجيبلريك فوقاش كيدير ميزاجور ؟


تاهو ماكيديرو تا كيوصل ل 15.3 مثلاً..


علاش ؟..لأنه واخا غالباً الاصدارات لولين فحال 15.1 كتكون فيهم ثغرة الجيلبريك،.. ولكن راه أغلب أدوات السيديا المعروفة كيكونو باقي ماداروش ليهم ميزاجور باش يتوافقو من الإصدار الجديد..


وبالتالي إذا درتي جيلبريك فبداية الإصدار الكبير غادي تعيش الغرق ديال المشاكل..

ماحيتك في المشاكل ديال ميزاجور والتطبيقات ..وماحيتك في المشاكل ديال الجيلبريك والأدوات ديالو الغير متوافقة ولي خصها بزاف التحسينات..


زيد عليها النظام لي هو في الأصل غير مستقر من طرف آبل..

ديك ساعة ماكتبقا تعرف فيناهما المشاكل ديال الجيلبريك من المشاكل ديال الميزاجور 😂..


أما ملي كيدير جيلبريك ل 15.3 مثلاً كتكون آبل صلحات أغلب الأخطاء في هاذ الاصدار..

والمطورين ديال الجيلبريك تاهما كيكونو صححو الكثير من الأخطاء في أدوات السيديا ديالهم ..


دابا المستخدم الذكي ديال الجيلبريك ملي كيدير هاذ الميزاجور لي قلنا كيحبس وماكيبقاش يدير تا ميزاجور .. 

بالتالي كيربح استقرار لا بأس به في النظام..وكيربح جيلبريك تاهو مستقر ..


فوقاش يقدر يدير ميزاجور مرة أخرى ؟ 


يا إما ماكيديروش نهائياً..و إما ماكيديرو تا كيتأكد من شي خبر بأن الاصدار 15.6 مثلاً فيه ثغرة الجيلبريك.. 


ديك ساعة كيمشي لداك الاصدار مباشرة ودغيا قبل ماتخرج آبل الاصدار 15.7 وتسد الثغرة..و كيصبر شي أيامات تا كيوجد ليه الجيلبريك ..


تقدر دير 15.7 و ترجع ل 15.6 بالكمبيوتر إذا سمعتي فيه الجيلبريك..لأن آبل ملي كتخرج شي اصدار جديد كتخلي لك فرصة ترجع للإصدار لي قبل منو.. 

ولكن خصك ترجع دغيا قبل ماتسد آبل فرصة الرجوع ليه..


 كذلك دائماً و غالباً اخر تحديث في الإصدار الكبير ماكيكونش فيه الجيلبريك..أولا تا كدوز عليه مدة طويلة عاد كيبان..


هادشي كنقولوه بالنسبة للناس لي بغاو يخدمو بجيلبريك ماكيحتاجش كمبيوتر وعندهم أي نوع آيفون سواءاً قديم أو جديد فحال الأيفون 11 أو 12 ..


أما إذا عندك من ايفون x لتحت فراه عندك الكريمة ديال جيلبريك checkra1n مدى الحياة..

يعني كدير ميزاجور وكدير جيلبريك كيما بغيتي و فوقاش مابغيتي..




لأن الثغرة كاينة في بياس ديال تيليفون وآبل ماتقدرش تصلح هاذ الثغرة 😂..


هادشي شرحناه باش مايجيش غداً شي واحد يجيب لينا آخر إصدار و يبقا يسول واش فيه جيلبريك أو لا .. 

ولا يقولينا درت ميزاجور و طاحت ليا ليطا.. 

لأن فهاذ الأسئلة ماغاديش نعاودو نجاوبو عليهم و ماعنقبلو تا شي بوسط من هاذ النوع في الكروب…


في الختام، أثبتت الأيام أن 14.3 ios كان هو أفضل إصدار خرجاتو آبل هاذ العام..

لا من ناحية الأداء و سرعة الهاتف و لا من ناحية البطارية لي كانت فيه مزيانة وماكاطيحش فيه ليطا..ولا من ناحية فرصة عمل الجيلبريك..

الرجوع للصفحة الرئيسية

reaction: